--------------------------------------------------------------------------------
حاولت اكتم عبرتي يوم فرقاه
والملم جروح الزمان الطعينه
واعطيه من قلب المعننى معاناه
واخذ من جروحه ولو هي دفينه
واضيع به في زحمة الناس وانساه
وانسى معه ذكرى السنين وحنينه
لقيت نفسي كل ما حل طرياه
عروق قلبي كلها تقول وينه
يامر على قلبي ولا شك ينهاه
كلي انا تحت الاشاره رهينه
ما كل من يضحك سعيد بدنياه
وما كل من يبكي دموعه حزينه
احدن بكى والكل يدري عن بكاه
وحدن مع الضحكه تحس بونينه
يا شين فرقى الحب ويا شين بلواه
والمشكله دنيا بلا حب شينه
والزين ما يكمل ولو كان ما احلاه
الا حبيبي ما تغير بزينه
بكتبه انا في صفحة الشعر وبقراه
وبدبحه بزود الغلا دون سكينه
وبرسمه في لوحة الشعر وبنعاه
وبدفنه بين الضلوع الحنينه
المزاج
الجمعة يونيو 12, 2009 3:56 am
